A Asociación de Desenvolvemento Rural Serra do Caurel cumpre os seus 25 anos de vida e, para celebralo, organiza unha serie de actividades que comezan co IV Bioblitz Courel e cos que pretende promocionar a riqueza etnográfica e ecolóxica deste territorio.
A día de hoxe a asociación conta con 70 socios cunha masa social diversa e transveral onde o 55% dos membros son mulleres. Nela hai establecementos e empresas de actividades vinculadas ao turismo, así como outras que se dedican á produción agroalimentaria artesanal, pero tamén construtores, carpinteiros, ensinantes, gandeiras, médicas ou coidadoras, entre outros.
O obxectivo principal da asociación segue sendo o de contribuír a que Courel teña un futuro construído a partir dos seus valores humanos, ambientais e culturais.
Con motivo deste aniversario, a Asociación de Desenvolvemento Rural Serra do Caurel deseñou o proxecto ‘2023 Un ano no Courel’ integrado por 11 subproxectos a través dos que transmitir a visión dun Courel con vida, dun Courel con futuro.
Estes 11 subproxectos estrutúranse en oito actividades que teñen en común a valorización do territorio creando comunidade. “Para elo programaranse un gran número de actuacións, algunhas xa consolidadas e outras para experimentar novas liñas de traballo, pero todas co fío condutor de xerar valor a partir do noso amosando o compromiso desta Asociación co futuro da Serra neste 25 aniversario da súa fundación”, explica o seu presidente Marcos Reinoso.
IV Bioblitz Courel
A primeira das actividades é un proxecto no que se combina unha experiencia de ciencia cidadá coa posta en valor de novos recursos do territorio e se plasma a ligazón entre a actividade agrogandeira e silvopastoral e a biodiversidade.
Trátase do IV Bioblitz Courel, que vai ter lugar os días 10 e 11 de xuño na Estación Científica do Courel. A actividade está coordinada pola Asociación Galega de Custodia do Territorio.
Un bioblitz é unha prospección intensiva de biodiversidade nunha área determinada, na que participan tanto naturistas profesionais como afeccionados, asesorados por expertos de campo. A edición deste ano completa as anteriores, levando a cabo durante os días 10 e 11 de xuño un inventario biolóxico coa fin de obter o maior número de identificación e citas da flora, fauna e micobiota en varios espazos representativos deste territorio.
As inscricións poden facerse a través da web www.custodiadoterritorio.org ata o día 8 de xuño.
Outras actividades
Entre as propostas de cara a este ano, tamén haberá actuacións en rutas turísticas, a elaboración dun mural mediante a técnica do esgrafiado, o Filandón das rapatoxas, accións de voluntariado, a Festa da cantarela, así como talleres e rutas relacionadas cos produtos e oficios que existen aínda no Courel, como un sobre o procesado tradicional da lá. Estas accións veranse completadas e recollidas nun documental conmemorativo dos 25 anos de actividade da asociación.
O proxecto ‘2023 Un ano no Courel’ conta para a súa realización cunha subvención de 39.315,70 € a través da sinatura dun convenio coa área de Medio Rural, Mar e Mocidade da Deputación de Lugo.
